«Айбын-2020» республикалық әскери-патриоттық байқауы басталды

• 27 қазан 2020
• Оқылған саны: 13831

2020 жылдың 28 қыркүйек күні Республикалық «Айбын-2020» VI республикалық әскери-патриоттық байқауы басталды. Аталмыш байқаудың ашылу салтанаты елордада өтті. Оған Маңғыстаулық оқушылар онлайн форматта қатысты.

Елдегі күрделі жағдайға байланысты іс-шара алғаш рет онлайн режимде өткізілуде. Республикалық жиынға әр өңірден барлығы 39 команда, соның ішінде Маңғыстау облысынан «Альтаир» және «Жас теңізшілер» атты 2 команда қатысып жатыр. Командаларға жетекшілік етіп отырған «Жас сарбаз» әскери-патриоттық қозғалысының МОФ төрағасы, Ақшұқыр мектеп-лицейінің АӘД пәні мұғалімі Мақсат Жолаев.

Биылғы сайыста әскери-қолданбалы спорт түрлерінен жарыстар өткізілмек. Қатысушылар «Айбын дарыны» интеллектуалдық ойыны, «Айбын жұлдызы», «Саламатты Жас Сарбаз», «Смарт Сарбаз» номинациялары бойынша бақ сынайды.

Әділқазылар алқасы Нұр-Сұлтан қаласында қатысушы жастардың өнерін сарапқа салатын болады. Олар онлайн көрсетілімдер арқылы жеңімпаздарды анықтайды.

Республикалық жиынның жабылу салтанаты 30 қараша ҚР Тұңғыш Президенті-Елбасы кітапханасында өтеді. Оған жеңімпаз командалардың капитандары шақырылатын болады. Ал шалғайдағы өзге қатысушылар қорытынды кешті бейнебайланыс арқылы тамашалай алады.

Олай болса, облысымыздың намысын қорғайтын командаларға сәттілік тілейміз! Қоржындарыңыз жүлделермен толықсын!