«Музей – тарих, музей – тағылым» тақырыбында облыстық семинар өтті

• 29 наурыз 2024
• Оқылған саны: 14

2024 жылдың 29 мамыры күні Білім берудің оқу-әдістемелік орталығының іс-шаралар жоспарына сәйкес, Ақтау қаласы М. Әуезов атындағы № 20 жалпы білім беретін мектебінде «Музей – тарих, музей – тағылым» тақырыбында облыстық семинар өткізілді.

Мұхтар Әуезовтің есімін ұлықтау, Ұлы жазушының мол мұрасын көпшілікке дәріптеу, насихаттау мақсатында өткізілген семинарға облыстағы жалпы білім беру ұйымдарының мұғалімдері мен директордың орынбасарлары, барлығы 50 педагог қатысты.

Маңғыстау облыстық Білім берудің оқу-әдістемелік орталығы Тілдерді дамыту бөлімінің жетекшісі Жайлаубаева Жансая Төребайқызы алғы сөз сөйлеп, семинарды ашты.

Семинардың алғашқы бөлімінде М. Әуезов атындағы № 20 жалпы білім беретін мектебінің музей жетекшісі М. Шопанқызы «Дәуірдің дара тұлғасы» тақырыбында баяндама оқып, Ұлы жазушы Мұхтар Әуезовтің музейін таныстырды. Қонақтар қаламгердің өткен өміріне көз жүгіртіп, жәдігерлері мен еңбектерін тамашалап, көптеген мағлұмат алды.

Директордың тәрбие ісі жөніндегі орынбасары Г. Құттыбай «Заманының заңғар жазушысы» тақырыбында TEDX форматта баяндама жасап, «Оқуға құштар мектеп» жобасы аясында атқарылып жатырған жобалар мен жұмыстарға тоқталды.

Бұдан соң шара «Бала Мұхтардан, дана Мұхтарға дейін...» көрінісімен жалғасын тапты. Одан кейін «Әлем таныған Әуезов» тақырыбында сахналық қойылым көрсетіліп, М.Әуезовтің «Абай жолы» роман-эпопеясында суреттелген Абайдың Ділдәнің ауылына алғаш барған сәтін тамашалады. Қойылымда қазақтың салт-дәстүрлері, әсіресе ұрын бару дәстүрі керемет сахналанды. Қонақтар мектеп ұстаздары мен оқушыларының актерлік шеберлігіне тәнті болды.

Семинар соңында мектептің әжелер ансамблі Абайдың «Көзімнің қарасы» әнін орындады.

Облыстық шараның жоғары деңгейде өтуіне атсалысқан Ақтау қалалық оқу-әдістемелік орталығына, мектеп директорының міндетін атқарушы Смағұлова Тілектес Қаршығақызына және мектеп ұжымына алғыс білдіреміз.