ПСИХОЛОГИЯЛЫҚ КЕҢЕС МҮШЕЛЕРІМЕН ОНЛАЙН СЕМИНАР ӨТТІ

• 14 қазан 2021
• Оқылған саны: 6237

2021 жылдың 13 қазан күні Білім берудің оқу-әдістемелік орталығының ұйымдастыруымен білім беру ұйымдарында психологиялық сүйемелдеу және әдістемелік қолдау жұмыстарын жүзеге асыру мақсатында облыстық психологиялық кеңестің 2021 жылға арналған іс-шаралар жоспарына сәйкес, кезекті онлайн семинар өтті.

Маңғыстау облысының білім басқармасы басшысының орынбасары А.Ж.Тұржанова модераторлық етке семинарға Білім берудің оқу-әдістемелік орталығы директорының орынбасары А. Мамаева, орталық мамандары мен облыстық психологиялық кеңес мүшелері қатысты.

Семинар барысында жасөспірімдер арасындағы құқықбұзушылықтың, зорлық-зомбылықтың алдын алуда директордың тәрбие жөніндегі орынбасарлары, педагог-психологтардың, әлеуметтік педагогтардың, сынып жетекшілердің рөлі, олардың қызметтік міндеттерінің маңыздылығы түсіндірілді.

Сондай-ақ, А. Тұржанова қазіргі таңдағы өзекті мәселелер – оқушыларға қатысты зорлық-зомбылықтың, құқық бұзушылықтың, өзіне-өзі қол жұмсаудың алдын-алу бойынша жұмыс сапасын арттыруда қабылдануға тиісті жедел шаралар туралы тапсырма берді.

Осы орайда, аудандық, қалалық деңгейде құрылған психологиялық кеңестердің жұмысының маңыздылығы мен оны жандандыру тәсілдері, жоспарға сәйкес шаралардың орындалуы басты назарда болуы ескертілді.

Қатысушылар семинар соңында өздеріне қажетті сұрақтарына жауап алып, ұсыныстары мен пікірлерін ортаға салды.