Маңғыстаулық мұғалімге «Қазақстанның еңбек сіңірген ұстазы» атағы берілді

• 10 қазан 2023
• Оқылған саны: 1086

Мемлекет басшысының жарлығымен Түпқараған ауданындағы Ақшұқыр мектеп лицейінің тарих пәнінің мұғалімі Қадырова Әлия Айтжанқызы «Қазақстанның еңбек сіңірген ұстазы» атағына ие болды. Еліміздің білім саласына қосқан үлесі үшін берілген құрметті марапатты бүгін облыс әкімі Нұрлан Ноғаев табыстады, - деп хабарлайды mangystaumedia.kz.

Әлия Қадырова 37 жылдан бері білім беру саласында еңбек етіп келеді. 1985 жылы Гурьев Педагогикалық институтын аяқтап, Бейнеу ауданында еңбек жолын бастаған. 2004 жылға дейін Бейнеу ауданындағы мектептерде мұғалім, кейін аудандық оқу бөлімінде әдіскер, 2004 жылдан бастап Жаңаөзен қаласындағы Жаңаөзен мектеп - лицейінде әдіскер, 2010 жылдан бастап Түпқараған ауданы №1 мектеп-лицейінде тарих пәнінен дәріс беріп келді. 2017 жылдан, Түпқараған ауданы «Ақшұқыр мектеп лицейінде» қызмет атқарады.

Әлия Айтжанқызының тынымсыз еңбегінің арқасында 23 оқушы халықаралық, республикалық, облыстық конкурстар мен олимпиадалардың жеңімпаздары, жүлдегерлері атанды.

“Қазақстанның еңбек сіңірген ұстазы” құрметті атағына ие болған педагогтар «педагог мәртебесі туралы» ҚР Заңында белгіленген мөлшерде біржолғы төлем алады.